شهرة المهزلة

مع اكتساح مواقع التواصل الاجتماعي حياتنا و استحواذها على جزء كبير من وقتنا و مع بروز العديد من الشخصيات و ازدياد شهرتها نكون في تساؤل لماذا لا نكون مشاهير

هي مال فصحى بهالزلك ( الزلك هو الزلق و يستخدم لوصف حالة الوقت الحالي)
بالتواصل الاجتماعي كل يوم يطلعنة شخص بشغلة شكل و فترة و يطك ( الطك بمعنى الانفجار و هو بمعنى الصعود السريع) فهواية ناس تفكر عمي ليش ما نصير احنة همين طاكين( نفس المعنى السابق لكنه بصفة) قابل الي طكوا احسن من عدنة و تبدي الفعاليات كل يوم واحد مطلع سالفة شكل يريد يصير مشهور

و كثير من الأمور الي تنشر ما تساعد انه يكون مشهور بالعكس تصير تصنيف ( بمعنى مدعاة للسخرية) و ينضحك على الشخص و يصير صدك مشهور بس مشهور مهزلة و مضحكة

اكو ناس تقبل المهم تصير مشاهير بس ما يفكرون بعواقب هالنوع من الشهرة ، سمعتك تصير مهزلة اسمك يصير مهزلة حتى تأثر على عائلك و محيطك و الأسوء من هذا شهرتك مة تدوم لأنه هيج نوع شهرة تكون نهايته چفصة ( معناها غطس بالوحل و تأتي بمعنى كارثة) و الناس الي ممكن ينعجبون بيك همة أسوء منك

قبل لا تفكر بهالشي فكر باللي حولك فكر بالتالي شنو بعد هالخطوة ، و اذا انت مبدع او تعتقد انك مبدع - مو تچفص و عبالك مبدع- سوي الي تبدع بيه و يجي يوم و الناس تعرفك و اذا ما اجة فانت نجوت من أن تكون مشهور مهزلة

فكر قبل أن تبتلي

 (منشور فيسبوك)

طلايب

ها خلصتوا عركات و هوسات و بوستات تاج راسك لو لا؟؟

اليومين الي فاتوا كلما افتح مواقع التواصل الاجتماعي تصير عندي حالة إحباط و كمية مشاعر سلبية ، طبعا صادفت ٨ شباط و بيه انقلاب جمهوري على جمهوري سبق ان إنقلب على ملكي و هالقصص من العراق العظيم و تاريخه المليان"طلايب" ( جمع طلابة و تأتي بمعنى مصيبة).

و تفتح المواقع تلگة واحد منزل بوست يمدح و يترحم و واحد منزل بوست شتم و واحد منزل بوست يرد على الأول و الأول ينزل بوست يرد عليه و ذاك يجاوبه و يكوله الوطنية وذاك يگوله خرب العراق (خرب يعني دمر) و كعادة العراقيين بكل مناسبة يصيرون فريقين و تصير مباراة كلاسيكو حامية و يا مكثر الكلاسيكو بالعراق .

بس ملاحظين شغلة ، الهوسة الي مشتغلة و الي صايرة هي عن حدث صار من ٥٠ سنة و تحس العقل متوقف عداده على هذاك الزمن و ما متقدم خصوصاً لمن تشوف الاندفاع بالقضية ، تحس إنه كل فئة عدهم تاج راس و مستميتين بالدفاع عنه و الأتعس تاج راسهم ميت و شابع موت و صار بكتاب التأريخ .

يعني إلى متى نظل هيچ ؟ كل مناسبة و عدنة عركة مات الريس عاش الزعيم الرحمة للملك و هلا بالمختار ، ترة ما توكلنة خبز و لا تبني وطن هالأشياء و هالهوسات ، شوكت نوصل لفكرة إنه الي صار قبل ٥٠ سنة ما راح يقدم و لا يأخر اليوم و أنه شي تأريخي صار و التاريخ هو الالي يحكم بيه مو كتاباتنة المخلوطة بمشاعرنا المبنية على أسسنا التربوية و الإجتماعية.

ليش ما نمشي الأمور و نستخدم حقنا الدستوري بالتغليس و عمي كلمن يحب خلي يحب الي يحبه بس مو يصدعنا بمشاعره و كلمن يكره خلي يكره بس لا يلعب نفسنة بكراهيته ( يلعب نفسك بمعنى الغثيان ) يا جماعة والله ملينة خلي نمشيهة للأمور

طبعا أني عن نفسي بكل يوم مناسبة استخدم حقي الدستوري بالتغليس يوم قبل المناسبة و يوم المناسبة و يوم بعدها إلى أن تهدأ و بصراحة ما إلي مزاج السلبية و اعكر يومي بسبب بوستات

(منشور فيسبوك)